मुस्ताङः भारतीय राजदूत रणजित राय नेपाल र चीनको सीमा कोरला पुगेर त्यहाँको वस्तुस्थितिको जानकारी लिएका छन्। रणजितले मुस्ताङ यात्राका क्रममा कोरला नाका पुगेर त्यहाको वस्तुस्थिततिबारे जानकारी लिएका हुन् । भारतले नेपालमाथि नाकाबन्दी लाएपछि तत्कालीन केपी शर्मा ओली सरकारले सो नाका खोल्ने प्रयास गरेको थियो ।
भारतीय राजदूत रायले छ दिनसम्म मुस्ताङमा बसेर नेपाल–चीन सीमाका विभिन्न गतिविधिबारे जानकारी लिएका छन् ।
मुस्ताङ बसाइँका क्रममा उनले भारतीय लगानीमा विभिन्न गाविसका निर्माण भएका आधा दर्जन आयोजनाको उद्घाटन गरे।
दूतावासका दुईजना उच्चअधिकारीसहित असोज ६ गते मुस्ताङ ओर्लेका उनले भोलिपल्टै योगेन्द्र उच्च मावि टुकुचेको भवन, कागबेनीमा निर्मित तटबन्ध र मुक्तिनाथस्थित झारकोटमा सामुदायिक भवनको उद्घाटन गरेका थिए।
असोज ८ मा उनले मुक्तिनाथ दर्शन गर्नुका साथै मुक्तिनाथ क्षेत्रमा निर्माण गरिएको धर्मशाला र खानेपानी आयोजनाको औपचारिक उद्घाटन गरे।
स्थानीयवासी र मुक्तिनाथका पुजारीसँगको छलफलमा राजदूत रायले सरकारले आग्रह गरेको खण्डमा मुक्तिनाथको गुरुयोजनालाई सहयोग गर्न तयार रहेको बताएका थिए।
मुक्तिनाथ क्षेत्र विकास कोष र पुरातत्व विभागले मुक्तिनाथको बृहत्तर विकासका लागि एक अर्ब रुपैयाँभन्दा बढीको गुरुयोजना तयार पारेको छ।
असोज ९ गते लोमान्थाङ पुगेका राजदूत रायले भारतीय लगानीमा त्यहाँ निर्मित लोमान्थाङ गुम्बा र नाङ्गेल गुम्बाको अवलोकनसमेत गरेका थिए।
सोही दिन राजदूत राय कोरला नाका पुगेका हुन्। नेपाल र चीनबीच दीर्घकालसम्म नाका सञ्चालन गर्ने बहस चलिरहेको बेला भारतीय राजदूतको भ्रमणलाई अर्थपूर्ण रुपमा हेरिएको छ।
लोमान्थाङ भ्रमणका क्रममा राजदूतको टोलीमा जिविस मुस्ताङका इन्जिनियर सकलदेव शर्मा पनि सहभागी थिए। रासस
0 comments:
Post a Comment